Rumıniyanın Konstitusiya Məhkəməsi məğlub olmuş ultramillətçi namizəd Corce Simionun ötən həftə keçirilən prezident seçkisinin nəticələrinə etirazını rədd edərək onun tələbinin "əsassız" olduğunu bildirib.

Simion heç bir sübut təqdim etmədən iddia edib ki, Fransa kimi xarici dövlətlər Moldovaya vəsait yönəltməklə "səsləri satın alıblar" və Aİ-yönlü və Ukraynanı dəstəkləyən Buxarest meri Nikuşor Danın xeyrinə səslər saxtalaşdırılıb.

Mayın 22-də verdiyi açıqlamada Konstitusiya Məhkəməsi bildirib ki, "seçki proseduruna əməl olunması ilə bağlı səlahiyyətləri çərçivəsində" mayın 18-də keçirilmiş ikinci turla bağlı Simionun şikayətini nəzərdən keçirib və "bu seçkilərin ləğv edilməsi tələbinin əsassız olduğu qənaətinə gələrək yekdilliklə rədd edib".

Rumıniya ötən ilin noyabrından bəri siyasi böhranla üzləşib. Bu, Rusiya tərəfdarı və marginial namizəd kimi tanınan Kelin Corceskunun səsvermənin ilk turunda gözlənilməz qələbə qazanması ilə başlayıb.

Lakin hakimiyyət orqanları onun namizədliyinin Rusiya tərəfindən aparılan kampaniya ilə dəstəkləndiyinə dair ittihamlar fonunda seçki nəticəsini ləğv edib. Corcesku yeni seçkilərdə iştirakdan uzaqlaşdırılıb və təkrar seçkilər üçün bir sıra yeni qaydalar tətbiq olunub. Həmin seçkilərin ilk turu mayın 4-də keçirilib.

Mayın 18-də N.Danın qələbəsi sürpriz olub. O, noyabrda keçirilmiş ilk səsvermədə, ümumiyyətlə, namizəd olmamışdı və bu yaxınlarda Buxarest meriyası vəzifəsində ikinci müddətinə başlamışdı.

ABŞ prezidenti Donald Trampın tərəfdarı və Rumıniyanın Birləşməsi Alyansının (AUR) lideri olan Simion Rumıniya ilə qonşu Moldova Respublikasının birləşdirilməsini və Ukraynaya hərbi yardımın dayandırılmasını təbliğ edir.

Alovlu çıxışları və bir vaxtlar futbol fanatizmi ilə məşğul olması ilə tanınan Simionun 2024-cü ildə Ukraynaya qarşı "sistemli anti-Ukrayna fəaliyyəti" səbəbiylə ölkəyə girişi üç il müddətinə məhdudlaşdırılıb. Moldova da onu milli təhlükəsizlik təhdidi hesab edərək ölkəyə girişinə qadağa qoyub.

Buna da bax:

Fransa Rumıniya seçkilərinə müdaxilə ilə bağlı Durovun ittihamlarını rədd edir

Ali Məhkəmə bu gün, mayın 22-də "İşçi Masası" Həmkarlar İttifaqları Konfederasiyası üzvü Elvin Mustafayevin şikayətini təmin etməyib və aşağı instansiya məhkəmələrinin qərarını qüvvədə saxlayıb.

Bu barədə onun yaxınları məlumat verib.

Yaxınları bundan əvvəl isə bildirmişdilər ki, E.Mustafayev saxlandığı 13 saylı Cəzaçəkmə Müəssisəsindən 6 saylı müəssisəyə köçürülüb və orada cərimə təcridxanasına (kars) salınıb. Onların vurğulamasına görə, mayın19-da Mustafayev cərimə təcridxanasından çıxarılmalı olsa da, bu, həyata keçirilməyib.

Yaxınlarının iddiasına görə, mayın 22-də də E.Mustafayev cərimə təcridxanasından elə birbaşa məhkəməyə gətirilib.

Yaxınlarının bu açıqlamasına Penitensiar Xidmətdən hər hanası münasibət almaq mümkün olmayıb.

19 may

Yaxınları Elvin Mustafayevin 'kars'a salındığını deyirlər

Mayın 6-dan bəri yaxınlarının barəsində məlumatları olmadıqlarını söylədikləri "İşçi Masası" Həmkarlar İttifaqları Konfederasiyası üzvü Elvin Mustafayevin 6 saylı Cəzaçəkmə Müəssisəsinə köçürüldüyü bildirilir.

Bu barədə mayın 19-da onun yaxınları məlumat veriblər.

Əvvəllər 13 saylı Cəzaçəkmə Müəssisəsində saxlanılan Mustafayev həmin gün – mayın 6-da siyasi məhbuslara dəstək məqsədilə aclıq aksiyasına başladığını açıqlamışdı.

Bildirdiyinə görə, bundan sonra ondan hər hansı xəbər almaq mümkün olmayıb.

Yaxınlarının vurğulamalarına görə, iki həftəyə yaxın bir müddətdən sonra E.Mustafayevin 6 saylı Cəzaçəkmə Müəssisəsinə köçürüldüyünü və orada cərimə təcridxanasına (kars) salındığını öyrəniblər.

Hələlik, bu məlumata Penitensiar Xidmətdən münasibət almaq mümkün olmayıb.

15 may

Yaxınları Elvin Mustafayevin taleyindən narahatdırlar

Yaxınları "İşçi Masası" Həmkarlar İttifaqları Konfederasiyasının həbsdə olan üzvü Elvin Mustafayevdən bir həftədən çoxdur xəbər ala bilmir.

Bu barədə mayın 14-də "İşçi Masası" məlumat yayıb.

Bildirilir ki, Mustafayev saxlanıldığı 13 saylı Cəzaçəkmə Müəssisəsində məhbusların hüquqlarının pozulmasına, həmçinin siyasi məhbusların azad edilməməsinə görə mayın 6-da aclıq aksiyasına başlayıb: "Bundan sonra ona təzyiqlər edilib və saxlanıldığı yer dəyişdirilib, lakin hazırda hansı müəssisədə saxlanıldığından xəbər yoxdur".

Yaxınlarının onun səhhətindən narahat olduqları vurğulanır.

Bu məlumata, hələlik, Penitensiar Xidmət və başqa rəsmi qurumlardan münasibət almaq mümkün olmayıb.

E.Mustafayev 2023-cü ilin avqustunda narkotik maddələrin satışında ittiham olunaraq saxlanılıb. 2024-cü il yanvarın 31-də Bakı Ağır Cinayətlər Məhkəməsi onu 3 il müddətinə azadlıqdan məhrum edib. Mustafayev ittihamı rədd edib və bunu onun "İşçi Masası"ndakı fəaliyyəti ilə əlaqələndirib: "Marketdən çıxanda dörd nəfər zorbalıqla mənə hücum etdi. Dərhal telefonumu götürdülər. Məni idarəyə gətirdilər. Dedilər ki, bunu boynuma götürməsəm, üzümə qadın qoyub, zorlama ilə ittiham edəcəklər. Yaxud "İran agenti" ittihamı ilə həbsə göndərəcəklər...".

2022-ci ildə yaradılan "İşçi Masası" Həmkarlar İttifaqları Konfederasiyasının dörd üzvü – sədr Afiəddin Məmmədov, üzvləri Ayxan İsrafilov, Elvin Mustafayev və Möhyəddin Orucov hazırda həbsdədir. Onlar müxtəlif ittihamlarla üzləşsələr də, ittihamların hamısını qurama, siyasi sayırlar.

Xatırlatma

Yerli hüquq-müdafiə təşkilatlarının hazırladıqları siyahılara görə, hazırda Azərbaycan həbsxanalarında təxminən 350 siyasi məhbus var. Rəsmilər ölkədə siyasi motivli həbslərin olmadığını deyirlər. Onların vurğulamasına görə, siyasi məhbus siyahılarında yer alan şəxslər sırf törətdikləri əməllərlə bağlı mühakimə ediliblər. Amma beynəlxalq insan haqları qurumları, ABŞ Dövlət Departamenti, Bakıdakı bir qrup Qərb diplomatı hökuməti haqsız tutulanları azad etməyə, müstəqil mediaya, vətəndaş cəmiyyətinə basqıları dayandırmağa çağırıb.

İsrail səfirliyinin iki əməkdaşı mayın 21-i axşam saatlarında Vaşinqtonda yerləşən Paytaxt Yəhudi Muzeyində keçirilən tədbirin yaxınlığında baş vermiş atışmada öldürülüb. Şübhəli şəxs həbs edilib.

"Reuters" Federal Təhqiqat Bürosu (FBI) və ABŞ Prokurorluq ofisinə istinadən xəbər verir ki, hadisə nəticəsində bir qadın və bir kişi öldürülüb.

30-yaşlı Elias Rodriqes olduğu ehtimal edilən şübhəlinin hücum zamanı "Fələstinə azadlıq!" şüarları səsləndirdiyi bildirilir.

Prezident Donald Tramp atışmanı pisləyib. "Açıq şəkildə antisemitizmə əsaslanan bu dəhşətli qətllər İNDİ bitməlidir!", - o, "Truth Social'da bildirib. "ABŞ-də nifrət və radikalizmə yer yoxdur".

İsrail prezidenti İsaak Hersoq və ABŞ dövlət katibi Marko Rubio da hadisəni pisləyiblər.

İsrailin Vaşinqtondakı səfirliyinin sözçüsü Tal Naim Koen bildirib ki, səfirliyin iki əməkdaşı muzeydə yəhudilərin tədbirinə qatılarkən yaxın məsafədən atəşə tutulub.

Hücum İsrailin girovları azad və HƏMAS qruplaşmasını məhv etmək üçün Qəzza zolağında yeni əməliyyata başlaması fonunda baş verib.

Litva hökuməti gürcü diplomatları və rəsmiləri üçün vizasız rejimin ləğvi haqqında qətnaməni təsdiqləyib. Bu barədə "Delfi" xəbər portalı məlumat yayıb.

Qətnamə Avropa İttifaqı (Aİ) Şurasının Gürcüstan rəsmiləri və diplomatları üçün viza rejiminin sərtləşdirilməsi ilə bağlı yanvarda qəbul edilmiş qərarına əsasən qəbul olunub. İndi bu şəxslər və onların ailə üzvləri qısamüddətli səfər zamanı Litvaya vizasız gedə bilməyəcək, onlar həmçinin uzunmüddətli vizaların verilməsi üçün sadələşdirilmiş prosedurdan istifadə etmək hüququnu da itirəcəklər.

Daha əvvəl Estoniya hökuməti Gürcüstan rəsmiləri və diplomatları üçün vizasız rejimi ləğv edib. "Diplomatik və xidməti pasportlara malik şəxslər üçün viza tələbinin tətbiqi beynəlxalq ictimaiyyətin, o cümlədən Aİ-nin sadə vətəndaşlara, etirazçılara və jurnalistlərə qarşı repressiyaları, polisin cəzasız qalmasını və hakim "Gürcü arzusu" partiyasının susqunluğunu qəbul etmədiyini göstərən növbəti addımdır", - Estoniyanın xarici işlər naziri Marqus Tsahkna deyib.

Litva, Latviya və Estoniya Gürcüstanın 2024-cü ildə Avropaya inteqrasiyadan imtina etməsi ilə bağlı kütləvi etirazlar fonunda ilk olaraq Gürcüstan hökumətinə qarşı sanksiyalar tətbiq edib. Xüsusilə, oliqarx, Rusiyayönlü "Gürcü arzusu" partiyasının qurucusu Bidzina İvanişvili və daxili işlər naziri Vaxtanq Qomelaurinin ölkəyə girişi qadağan ediblər.

Rusiyanın xarici işlər naziri Sergey Lavrov mayın 21-də Yerevanda deyib ki, Moskva Ermənistanın suverenliyi və ərazi bütövlüyünü dəstəkləməyə hazırdır. Ermənistanın xarici işlər naziri Ararat Mirzoyan ilə birgə mətbuat konfransında çıxış edən Lavrov Rusiyanın Ermənistanla müttəfiqlik münasibətlərinə önəm verdiyini deyib: "Biz təhlükəsizlik sahəsini ən mühüm istiqamətlərimizdən biri kimi görməyə davam edirik. Biz Ermənistanın müdafiəsi, suverenliyi və ərazi bütövlüyünün təmin olunması üçün bütün mümkün vasitələrlə dəstək göstərməyə hazırıq".

Lavrov həmçinin regionda sülh prosesinə də toxunub. Onun sözlərinə görə, Cənubi Qafqazdakı problemlər buradakı ölkələr və yaxın qonşular tərəfindən həll olunmalıdır: "Biz heç bir halda bölgədənkənar ölkələrin buradakı ölkələrlə münasibətlərini inkişaf etdirməsinə qarşı deyilik, amma bu əməkdaşlıq regionda gərginlik yaratmağa və ya geosiyasi oyunlar məqsədilə region ölkələrinin maraqlarını saymamağa yönəlməməlidir".

Lavrov regional "3+3" formatı haqqında da danışıb və qeyd edib ki, növbəti görüşə ev sahibliyi etmək istəyən Ermənistan və Azərbaycan bu barədə öz aralarında razılığa gələ bilərlər.

"Biz növbəti iki görüşün Ermənistan və Azərbaycanın paytaxtlarında keçirilməsinin tərəfdarıyıq," – Lavrov əlavə edib.

Xatırlatma

Ötən əsrin 90-cı illərinin əvvəllərində Qarabağ münaqişəsi Azərbaycan və Ermənistan arasında toqquşmalar doğurmuş, Azərbaycanın Qarabağ bölgəsi və ətrafındakı 7 rayon işğal edilmişdi. 2020-ci il 44 günlük müharibə və 2023-cü ilin sentyabrında Qarabağdakı birgünlük hərbi əməliyyatlardan sonra Azərbaycan ərazi bütövlüyünü bərpa edib. Azərbaycan birgünlük əməliyyatı "antiterror tədbirləri", Yerevan isə "etnik təmizləmə" adlandırıb. Həmin əməliyyatdan sonra bölgənin erməni əhalisi Ermənistana köç edib.

Son illər iki ölkə arasında müxtəlif formatlarda danışıqlar aparılsa da, hələlik, sülh sazişi imzalanmayıb. Bununla belə, tərəflər bu yaxınlarda saziş üzrə bütün maddələrin razılaşdırıldığını açıqlayıblar.

Azərbaycanda "Gender bərabərliyi üzrə 2025-2027-ci illər üçün Milli Fəaliyyət Planı" hazırlanıb. Bu, Ailə, Qadın və Uşaq Problemləri üzrə Dövlət Komitəsinin 2025-ci il üzrə məlumatında əksini tapıb. Sənəd Milli Məclisin Ailə, qadın və uşaq məsələləri komitəsinin mayın 21-də keçirilən iclasında müzakirəyə çıxarılıb.

Sənədlə bağlı bir sıra məlumatlar yerli saytlarda da yayılıb. Bildirilib ki, Azərbaycanda doğulan uşaqların cins nisbəti hər 100 qıza 113 oğlan təşkil edir. Ekspertlər bunu abortlarla izah edirlər. Onlar deyirlər ki, son illər bu nisbət oğlanların xeyrinə artmaqdadır. Artıq Azərbaycanda qanunsuz abortlarla bağlı cərimələr də artırılır.

Sənəddə vurğulanır ki, 2024-cü ildə ümumilikdə 359 mühafizə orderi icraatda olub (2023-cü ilə nisbətən +163). Onlardan 338-i qadınlar (+151) , 21-i kişilər (+12) barədə verilib.

Baş Prokurorluğa istinadla bildirilir ki, ötən il qeydə alınmış cinayət hadisələri üzrə 22 min 325 zərərçəkmiş şəxsin 7 min 130-u qadın olub. Zərərçəkmiş qadınlardan 3 min 59-u xəsarət alıb, 268-i isə ölüb. Müqayisə üçün, 2023-cü ildə 24 min 287 zərərçəkmiş şəxsin 7 min 134-ü qadın olub.

2024-cü ildə 162 insan alveri cinayəti qeydə alınıb ki, zərər çəkmiş 91 qurbandan 90-ı qadın olub.

Dövlət komitəsinin hesabatında bildirildiyinə görə, ölkədə erkən evliliyin sayı da azalır. 2024-cü ildə 18 yaşınadək anaların dünyaya gətirdiyi uşaqların sayı əvvəlki ilə nisbətən 463 nəfər azalaraq 1 min 279-a düşüb.

Buna da bax:

Oğlan-qız nisbəti ən çox hansı rayonda pozulur...

Bu gün, mayın 21-də Yasamal rayon Məhkəməsində Siyasi Menecment İnstitutunun direktoru, politoloq Azər Qasımlının həbsinin ev dustaqlığı ilə əvəzlənməsi ilə bağlı vəsatətə baxılıb.

Məhkəmə vəsatəti təmin etməyib.

A.Qasımlı 2024-cü il dekabrın 8-də həbs olunub. Ona qarşı Cinayət Məcəlləsinin 182.2.3-cü (Hədə-qorxu ilə tələb etmə, zor tətbiq etmə ilə törədildikdə) maddəsi ilə ittiham irəli sürülüb. O özünü təqsirli bilmir və həbsini tənqidli fəaliyyəti ilə əlaqələndirir. Amma rəsmilər, bir qayda olaraq, ölkədə siyasi həbslərin olması ilə bağlı deyilənləri qəbul etmirlər.

Yerli hüquq müdafiəçilərinin hesablamalarına görə, hazırda ölkə həbsxanalarında 350-dən çox siyasi məhbus var. Hökumət belə siyahılarla razılaşmır.

17 yanvar

Azər Qasımlının xanımı polisdə ifadə verib

Siyasi Menecment İnstitutunun həbsdə olan rəhbəri Azər Qasımlının həyat yoldaşı Samirə Qasımlı yanvarın 17-də Yasamal rayon Polis İdarəsində ifadə verib.

Bu barədə onun özü məlumat açıqlayıb.

S.Qasımlı qeyd edib ki, o, həyat yoldaşına açılmış cinayət işi üzrə dindirilib: "Mən müstəntiqə bildirdim ki, iş qondarmadır və siyasi sifarişdir. Dindirmə zamanı bir neçə suala cavab verdim, digərlərinə isə yaxın qohuma qarşı ifadə verməməklə bağlı konstitusion hüququmdan yararlanaraq cavab verməkdən imtina etdim".

Avropa İttifaqı (Aİ) Suriyaya qarşı iqtisadi sanksiyaları qaldırmağa qərar verib. Bu barədə Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas mayın 20-i axşam elan edib.

"Biz Suriya xalqına yeni, inklüziv və dinc Suriyanı bərpa etməkdə kömək etmək istəyirik. Aİ son 14 il ərzində həmişə suriyalıların yanında olub və bunu etməyə davam edəcək", - Kallas X sosial media hesabında yazıb.

"Reuters" agentliyinin məlumatına görə, sanksiyaların ləğvi xüsusilə Suriya Mərkəzi Bankına şamil olunacaq. Aİ həmçinin üzv dövlətlərə ölkənin bərpası, terrorizmlə mübarizə və nəzarətsiz miqrasiyanın qarşısının alınması sahələrində əməkdaşlıq məqsədilə Suriyanın müdafiə və daxili işlər nazirliklərinə maliyyə dəstəyi göstərməsinə icazə verəcək.

Mayın əvvəlində ABŞ prezidenti Donald Tramp Suriya iqtisadiyyatına qarşı sanksiyaların ləğv ediləcəyini açıqlayıb. O, bu qərarını Suriyada yeni hökumətin formalaşdırılması ilə izah edib. Tramp yeni hökumətin ölkədə vəziyyəti sabitləşdirə və sülhü qoruya biləcəyinə ümid etdiyini deyib.

Vaşinqton 2000-ci illərin əvvəllərində Suriyaya qarşı sanksiyalar tətbiq edib. ABŞ ilkin sanksiyalar paketini Bəşər Əsəd rejimi tərəfindən Livan ərazilərinin işğalı, İraqın işlərinə qarışması, "Hizbullah" və HƏMAS-a dəstəyi ilə izah edib. Aİ bu sanksiyalara 2011-ci ilin əvvəlində qoşulub.

2024-cü ilin dekabrında Suriyada Əsəd rejiminin devrilməsindən sonra iqtidara gələn yeni hökumət Qərb ilə rəsmi əlaqələri bərpa edib. Keçid prezidenti Əhməd əş-Şaraa ABŞ-nin xüsusilə təhlükəli terrorçular siyahısından çıxarılıb. Aİ nümayəndələri onunla görüşlər keçirib, prezident Tramp isə mayda onunla görüşüb.

İran mayın 21-də bildirib ki, 2023-cü ildə Tehrandakı Azərbaycan səfirliyinə qarşı törədilmiş ölümcül hücumda təqsirli bilinən şəxs edam edilib. Bu hücum iki qonşu ölkə arasında münasibətlərin ciddi şəkildə pisləşməsinə səbəb olmuşdu.

İran mətbuatı ölkənin ədliyyə sisteminə istinadən yazıb ki, Tehrandakı Azərbaycan səfirliyinə hücum edən şəxs bu səhər edam olunub.

Edam qərarı İran prezidenti Məsud Pəzeşkianın ötən ayın sonunda Bakıya etdiyi səfərdən sonra həyata keçirilib və bu addım iki ölkə arasında münasibətlərin yaxşılaşmasına dair bir işarə kimi qiymətləndirilir.

Xatırlatma

Yasin Hüseynzadə kimi təqdim edilən şəxs 2023-cü il yanvarın 27-də Azərbaycanın Tehrandakı səfirliyinə "Kalaşnikov" markalı avtomat ilə hücum edib. Hədisə nəticəsində səfirliyin bir əməkdaşının həlak olduğu, iksinin isə xəsarət aldığı açıqlanıb. O, səfirlikdə öz həyat yoldaşını axtardığını və onu xilas etmək istədiyini bildirmişdi.

Amma Azərbaycanın rəsmi qurumları bu iddianı təsdiqləməmişdilər. Həmin olaydan sonra səfirliyin bütün işçiləri Azərbaycana təxliyə edilib. Yalnız ötən ilin yayında Azərbaycanın Tehrandakı səfirliyi öz işini tam olaraq bərpa edib.

Azərbaycan prezidenti İlham Əliyev yerli mediaya müsahibəsində silahlı hücumu "təşkil olunmuş terror aktı" adlandırıb.

Avropa İttifaqı (Aİ) AzadlıqRadiosuna 5.5 milyon avro ayıracaq. Bunu Aİ-nin xarici siyasət və təhlükəsizlik siyasəti üzrə ali nümayəndəsi Kaya Kallas mayın 20-də jurnalistlərə bildirib.

"Bu, müstəqil jurnalistikanı dəstəkləmək üçün nəzərdə tutulmuş qısamüddətli təcili maliyyə yardım paketidir", – Kallas qeyd edib.

AzadlıqRadiosuna Aİ tərəfindən ayrılan bu vəsait məqsədli şəkildə yönəldiləcək və Aİ-yə qonşu ölkələrdə, o cümlədən Qafqaz və Mərkəzi Asiyada yayım fəaliyyəti üçün istifadə olunacaq.

Çexiyanın xarici işlər naziri Yan Lipavski mayın 20-də Aİ XİN rəhbərlərinin görüşündən sonra "Reuters"ə deyib: "Məqsədimiz missiyanı qoruyub saxlamaqdır, bu missiya isə Rusiyada, Belarusda və İranda cəmiyyətlərə azad və ədalətli məlumat təqdim etməkdir".

İsveç isə bu ayın əvvəlində bildirib ki, ölkə AzadlıqRadiosuna 20 milyon kron (2.07 milyon ABŞ dolları) məbləğində ianə ayıracaq. İsveçin bəyanatına görə, ABŞ-nin maliyyələşdirmə ilə bağlı qərarı bir çox ölkədə insanların azad mediaya çıxışını itirməsi riskini artırır.

Prezident: "RFE/RL-in varlığı risk altındadır"

Azad Avropa/Azadlıq Radiolarının (RFE/RL) prezidenti Stiven Kapus Aİ-nin ayırdığı yardımla bağlı deyib: "RFE/RL-i ayaqda saxlamaq üçün bu təcili maliyyə yardımının ayrılmasına görə minnətdarıq. Avropa Komissiyasının vitse-prezidenti Kaya Kallasın, Çexiyanın xarici işlər naziri Yan Lipavski və digərlərinin prinsipial liderliyi sayəsində RFE/RL-in fəaliyyətini bir az da uzada biləcəyik. Bu arada ABŞ məhkəmələrində Konqresin bizə ayırdığı vəsaitin verilməsini təmin etməyə çalışırıq. Bu vəsait ayrılmadıqca RFE/RL-in varlığı risk altındadır".

AzadlıqRadiosu Konqres tərəfindən ayrılmış vəsaitə çıxış hüququ əldə etmək üçün ABŞ Qlobal Media Agentliyini (USAGM) məhkəməyə verib.

Bu müddət ərzində "Настоящее Время" kanalının yayımı üç peykdən ikisi vasitəsilə dayandırılıb, AzadlıqRadiosunun Belarus və Ukrayna redaksiyalarının fəaliyyəti əhəmiyyətli dərəcədə azaldılıb, Rusiya xidməti tərəfindən orta dalğa (AM) üzərindən yayımlanan verilişlər dayandırılıb, "Votvot" adlı layihə bağlanıb.

Rusiya İstintaq Komitəsinin rəhbəri Aleksandr Bastrıkin deyir ki, hərbi uçota durmayan yeni Rusiya vətəndaşlarını aşkara çıxarmaq üçün komitənin müstəntiqlərinə miqrantların toplaşdığı yerlərdə reydlərdə Daxili İşlər Nazirliyi və Milli Qvardiya ilə birgə iştirak etməyi tapşırıb.

Sankt-Peterburq hüquq forumunda çıxış edən Bastrıkinin sözlərinə görə, 80 min "belə Rusiya vətəndaşı" artıq "tutulub" və "20 min nədənsə Özbəkistan, Tacikistan, Qırğızıstanda yaşamağı sevməyən gənc Rusiya vətəndaşı cəbhə xəttindədir".

İstintaq Komitəsinin rəhbəri həmçinin bildirib ki, miqrant adı altında "gələcək cinayətkarlar" Rusiyaya gəlirlər və onların da tutularaq vətənlərinə qaytarılması lazımdır ki, "cinayətləri Rusiyada deyil, orada törətsinlər".

Rusiya hüquq-mühafizə orqanları mütəmadi olaraq reydlər keçirir və bu reydlər zamanı Rusiya vətəndaşlığı olan miqrantlara çağırış vərəqəsi verilir və ya hərbi komissarlığa aparılır. Bəzi hallarda onları Rusiya vətəndaşlığından çıxarmaqla, deportasiya ilə hədələyərək Müdafiə Nazirliyi ilə müqavilə bağlamağa məcbur edirlər.

Bir il əvvəl Bastrikin demişdi ki, güc qurumları yaxınlarda Rusiya vətəndaşlığı almış, lakin hərbi qeydiyyatdan keçməmiş 30 mindən çox miqrantı "yaxalayıb". Onlardan təxminən 10 mini "səngərlər qazmaq və istehkam düzəltmək üçün" arxa cəbhə bölmələrinə göndərilib.

İranın müdafiə naziri briqada generalı Əziz Nəsirzadə Ermənistana səfər edib.

Ermənistan müdafiə naziri Suren Papikyan bildirib ki, iranlı həmkarı onun dəvəti ilə bu ölkədə səfərdədir.

19 may

Zakir Həsənov İsraildədir

İranla birgə təlim keçirildiyi bir gündə, mayın 19-da Azərbaycan Müdafiə Nazirliyinin (MN) rəhbərliyi İsraildə səfərdə olub. Rəsmi məlumata görə, səfər çərçivəsində müdafiə naziri general-polkovnik Zakir Həsənov İsrailin müdafiə naziri İsrael Kats və Müdafiə Qüvvələrinin Baş Qərargah rəisi general-leytenant Eyal Zamir ilə görüşüb. "Görüşlərdə hərbi əməkdaşlığın inkişaf perspektivlərinə dair ətraflı fikir mübadiləsi aparılıb", - məlumatda vurğulanıb.

Hərbi ekspertlər İsrailin Azərbaycanın silah aldığı ölkələr içərisində başlıca yerlərdən birini tutduğunu deyirlər. Zaman-zaman İsrail Azərbaycan əməkdaşlığı rəsmi Tehranın narazılıq dolu açıqlamaları ilə də müşahidə edilib.

Azərbaycan İranla birgə hərbi təlim keçirir

Azərbaycan işğaldan azad edilmiş ərazilərində İranla birgə hərbi təlim keçirir.

Bu barədə Azərbaycan Müdafiə Nazirliyi məlumat verib.

Nazirliyin açıqlamasına görə, bu gün, mayın 19-da açılışı olan "Araz-2025" birgə təlimi işğaldan azad olunmuş ərazilərdə mayın 21-dək davam edəcək.

Birgə təlimə İran İslam Respublikasından cəlb olunan heyətin rəhbəri və digər iştirakçıları artıq bir neçə gündür Azərbaycandadırlar.

Halbuki, 2024-cü ilə qədər iki ölkə arasında münasibətləri gərginləşdirən bir çox olaylar yaşanmışdı. Xüsusilə, hər iki ölkənin bir-birinin sərhədinə yaxın ərazidə hərbi təlimlər keçirməsi qarşılıqlı narazılıqlar doğurmuşdu. Üstəlik, Azərbaycanda hakimiyyətə yaxın media qurumlarında İranda bəzi dairələr ölkənin işğal altında olan ərazilərində separatçı qurumları himayə etməkdə günahlandırılırdı. İran belə iddiaları təkzib edirdi.

2023-cü il yanvarın 27-də isə Azərbaycanın Tehrandakı səfirliyinə "Kalaşnikov" avtomatı ilə silahlı hücum da olmuşdu. Hədisə nəticəsində səfirliyin bir əməkdaşının həlak olduğu, ikisinin isə xəsarət aldığı açıqlandı. Bundan sonra səfirliyin işçiləri Azərbaycana təxliyə edildi.

Ardınca da Azərbaycanda bir çox həbslər oldu. Saxlananlar ən müxtəlif ittihamlarla (ən çox da narkotiklə) üzləşsələr də, hökumətə yaxın media qurumlarında onlar "İran casusu" kimi təqdim edilirdilər. Hərçənd onların yaxınları bununla dini kəsimdən olan bir çox şəxslərin şərləndiyini dedilər.

Amma xüsusilə son bir ildə hər iki tərəfin rəsmiləri bir-biriləri ilə əməkdaşlığa dair fikirlər səsləndirirlər. Ötən ilin iyulunda Azərbaycanın İrandakı səfirliyinin fəaliyyəti bərpa edilib. İki ölkə arasında birgə təlimlərin keçirilməsinə başlanıb.

Ermənistanla Qarabağ münaqişəsi üzündən Azərbaycan bir neçə on il ərazilərinin 20 faizinə nəzarəti itirib. 2020-ci ildə 44 günlük savaş, 2023-cü ildə isə birgünlük hərbi əməliyyatlarla Azərbaycan işğala son qoyub, bütün ərazilərində suverenliyini bərpa edib.

Beş nəfərin xəsarət aldığı olayın "Azərikimya" İstehsalat Birliyinin Etilen-polietilen zavodunda baş verdiyi açıqlanıb.

Yerli saytların məlumatına görə, Azərbaycan Dövlət Neft Şirkətinin (SOCAR) tabeçiliyində olan bu zavoddan bildirilib ki, saat 12:00 radələrində istehsalatın sintez sahəsində, "B" texnoloji xəttində aşağı təzyiq ayırıcısında reqlamentə uyğun təmir işi apararkən hadisə baş verib.

Əlavə edilib ki, hadisənin səbəbi araşdırılır.

Əsası ötən əsrin ortalarında qoyulan həmin müəssisədə sonradan modernizasiya işlərinin aparıldığı açıqlanıb.

+++

Bu gün, mayın 20-də Sumqayıt şəhərində yanğınla müşahidə edilən partlayış baş verdiyi və xəsarət alanların olduğu bildirilir.

Tibbi Ərazi Bölmələrini İdarəetmə Birliyindən (TƏBİB) verilən məlumata görə, partlayış səbəbi ilə saat 12:20 radələrində beş nəfər Sumqayıt Tibb Mərkəzinin nəzdindəki Təcili Tibbi Yardım Xəstəxanasına hospitalizasiya olunub.

"Vəziyyəti ağır qiymətləndirilən üç nəfər Nərimanov Tibb Mərkəzinin nəzdində olan Yanıq Mərkəzinə təxliyə olunur. Digər iki nəfərin müalicəsi isə müvafiq şöbədə davam etdirilir, vəziyyətləri orta ağırdır", - məlumatda bildirilir.

Yerli saytlarda hadisənin Sumqayıt şəhərindəki müəssisələrdən birində baş verdiyi vurğulanır. Amma hadisənin səbəb və detalları açıqlanmır.

Məsələ ilə bağlı, hələlik, zərərçəkənlərin yaxınları və Fövqəladə Hallar Nazirliyi ilə danışmaq mümkün olmayıb.

"Telegram" sosial media şəbəkəsinin yaradıcısı Pavel Durov bildirib ki, Fransa kəşfiyyatı ondan Rumıniyada keçirilən prezident seçkilərinin ikinci turu ərəfəsində mesajlaşma tətbiqində rumın sağçılarının şərhlərini silməsini istəyib. Lakin Fransanın Xarici Təhlükəsizlik Baş İdarəsi (DGSE) bu ittihamı rədd edib.

Durov mayın 18-i axşam – Rumıniyada səsvermə günü – sosial şəbəkədə paylaşım edərək bildirib ki, Fransa kəşfiyyatının rəhbəri Nikolya Lerner ondan Rumıniyada seçkilər ərəfəsində mühafizəkar səsləri qadağan etməyi xahiş edib. Durov bu tələbi yerinə yetirməkdən imtina etdiyini deyib.

Səsvermə 54 faiz səslə Danın gözlənilməz qələbəsi ilə nəticələnib. Bu seçki noyabrda keçirilmiş ilkin seçkinin ləğv edilməsindən sonra baş tutub. Həmin seçki sosial şəbəkələr vasitəsilə Rusiyanın müdaxiləsi iddiaları səbəbiylə ləğv olunmuşdu.

DGSE mayın 19-da yaydığı bəyanatda bildirib: "DGSE seçki prosesi ilə əlaqəli hesabların qadağan olunması ilə bağlı hər hansı bir tələb irəli sürüldüyü iddialarını qəti şəkildə rədd edir".

40 yaşlı Durov əvvəlcə bu tələbin "Qərbi Avropa hökuməti" irəli sürüldüyünü iddia etmişdi. Həmin paylaşımda o, həmçinin fransız baqetinin emojisi də işlətdiyindən söhbətin Fransadan getdiyi ehtimal olunurdu.

Durov daha sonra paylaşım edərək Fransanın kəşfiyyat rəhbəri Lernerin adını birbaşa qeyd edib.

DGSE isə açıqlamasında bildirib ki, son illərdə bir neçə dəfə Durovu "şirkətinin və şəxsən özünün terror və uşaq pornoqrafiyası ilə bağlı təhlükələrin qarşısının alınması baxımından daşıdığı məsuliyyətlər" barədə qəti şəkildə xəbərdar etməyə məcbur olub.

Durov ötən ilin avqustunda Paris yaxınlığındakı hava limanında saxlanıldıqdan sonra beynəlxalq manşetlərə çıxmışdı. O, avqustun 28-də "Telegram" mesajlaşma tətbiqində iddia edilən qanunsuz fəaliyyətlərlə bağlı bir neçə cinayət maddəsi üzrə ittiham olunmuşdu. Lakin 5.5 milyon dollar girov ödəməklə həbsdən yayına bilmiş və Fransanı tərk etməmək, həmçinin həftədə iki dəfə polis bölməsinə müraciət etmək şərtiylə azadlığa buraxılmışdı.

Fransız prokurorlar Durovu "Telegram" tətbiqində narkotik alverinə və uşaqlara aid seksual xarakterli görüntülərin paylaşılmasına göz yummaqda, həmçinin tətbiqdəki qanunsuz fəaliyyətlərlə bağlı aparılan istintaqda tələb olunan sənədləri təqdim etməkdən imtina etməkdə günahlandırıblar.

Durov bu həbsi "əsassız" adlandırsa da, o vaxtdan bəri "Telegram" bu ittihamlarla bağlı qaldırılan məsələləri birbaşa hədəf alan müəyyən tədbirlər görüb.

Rusiya Baş Prokurorluğu 'Amnesty International' beynəlxalq insan haqları təşkilatını "arzuolunmaz" təşkilat elan edib.

Dövlət qurumu iddia edir ki, təşkilatın Londondakı mənzil-qərargahı Ukraynanın "himayədarları tərəfindən maliyyələşdirilən qlobal rusofob layihələrin hazırlanma mərkəzi"dir. Baş Prokurorluq hesab edir ki, 'Amnesty International'ın üzvləri "ekstremist" təşkilatları dəstəkləyir və "xarici agentlərin" fəaliyyətini maliyyələşdirir.

2025-ci ilin martında 'Amnesty International' illik hesabatını dərc edib. Həmin hesabatda bildirilib ki, Rusiya hakimiyyəti ukraynalı hərbi əsirləri və girov mülki şəxsləri işgəncələrə, xarici aləmlə əlaqəsiz şəkildə uzun müddət həbsdə saxlamağa, zorla yoxa çıxarma hallarına və digər qeyri-insani rəftarlara məruz qoyub. Hüquq müdafiəçiləri bildirirlər ki, belə rəftar hərbi cinayətlərə və insanlığa qarşı cinayətlərə bərabərdir.

'Amnesty International' 1961-ci ildə Böyük Britaniyada yaradılmış beynəlxalq qeyri-hökumət təşkilatıdır. Onun işi, internet səhifəsində qeyd edildiyi kimi, insan hüquqları problemlərinin yerlərdə araşdırılması və təhlili, beynəlxalq həmrəylik kampaniyaları və insan hüquqlarının inkişafı üçün hökumətlər və vətəndaş cəmiyyəti ilə qarşılıqlı əməkdaşlıqdan ibarətdir.

"Amnesty"nin Rusiyaya cavabı: Səylərimizi ikiqat artıracağıq

"Amnesty International" Moskvanın təşkilatı "arzuolunmaz" elan etməsindən sonra Rusiyada insan haqları pozuntularını ifşa etmək üçün səylərini ikiqat artıracağına söz verib.

"Əgər hakimiyyət orqanları bizim təşkilatımızı "arzuolunmaz" elan etməklə insan haqları pozuntularını sənədləşdirmək və ifşa etmək işimizi dayandıracağımızı düşünürlərsə, dərindən yanılırlar – əksinə", - "Amnesty International"ın baş katibi Anyes Kallamar açıqlamasında bildirib.

"Biz təhdidlərə boyun əyməyəcəyik və Rusiyada insanların ayrıseçkilik olmadan insan haqlarından istifadə edə bilmələrini təmin etmək üçün əzmkar şəkildə fəaliyyətimizi davam etdirəcəyik. Ukraynada Rusiya tərəfindən törədilən müharibə cinayətlərini sənədləşdirməyə və dünya miqyasında bunu açıqlamağa davam edəcəyik. Həm ölkə daxilində, həm də xaricdə Rusiyanın açıq-aydın insan haqları pozuntularını ifşa etmək üçün səylərimizi ikiqat artıracağıq".

"Arzuolunmaz təşkilat" qanunu Rusiyada 2015-ci ildə qəbul olunub və xarici mənbələrdən maliyyə dəstəyi alan təşkilatları hədəf alır.

Rusiya siyahıdakı təşkilatların ölkənin milli təhlükəsizliyinə təhdid olduğunu iddia edir. Bununla belə, ekspertlər bunun sadəcə Rusiya hakimiyyətinin Kremlin fikirlərinə uyğun gəlməyən səsləri boğmaq cəhdi olduğunu deyir.

2024-cü ildə AzadlıqRadiosu da Rusiyada "arzuolunmaz"lar siyahısına salınıb.

Rusiya vətəndaşlarını "arzuolunmaz" təşkilatlarla əməkdaşlıq etdiklərinə və ya onların Rusiya daxilində maliyyələşdirilməsinə kömək etdiklərinə görə 5 ilə qədər həbs cəzası gözləyir.

Rusiya artıq üç ildir "Amnesty International"ın saytlarına girişi bloklayıb və Moskva ofisini qeydiyyatdan çıxarıb.